It tilt yn Eastermar op fan de barrens en meastentiids binne dy foar 'eigen publyk'. Mar dit wykein liet Eastermar sjen dat it ek oars kin en waard ús unike lokaasje ôfstien oan ús gasten.

It 'trekkerfolk' koe it hert ophelje by de Oldtimerdei dy 't de famylje de Jong fan de Sumarderwei al jierren mei organisearret. Harren 'foartún' is ien grut werom-nei-de-âlde-tiid mei âlde traktoaren, auto's, brommers en motoaren. It binne der allle jierren mear. Fansels sneupe hjir ek wol Eastermarders om mar it grutte publyk komt út de omkriten wei.

Fierder waard Eastermar ferrast troch in ynfaazje fan sylboatsjes, trailers, campers, caravans en sylfolk. De organisaasje fan de Combi-Noordsylwedstriden foar de jeugd út hiel Noard-Nederlân, hie dit jier de Komerk, de Burgumer Mar en de Leien útkeazen as lokaasje. De Eastermarder frijwilligers en wettersportferiening stienen ek hjir ree om te helpen en te soargjen foar in gastfrij en fral waarm ûnthaal.

Al mei al in moai stikje PR foar ús eigen Eastermar en it is te hoopjen dat dizze sylwedstriden ta in regelmjittich barren útgroeie sille. Want it doarp en de foarsjennings binne der klear foar!