Sûnt juster leit de 'Veteraan', in bakdekker út 1928 yn de passantehaven fan Eastermar. It skip leit hjir op útnoeging, fanwege de iepening kommende freed fan de Komerk. De bakdekker 'Veteraan' is lid fan de feriening 'Oude Glorie'. Yn it skip leit in bysûndere motor. De grutte 42 pk dieselmotor leit nammentlik op syn kant. Dit is dien om de flier yn de kajút hielendal flak hâlde te kinnen.

de 'Veteraan' fan de famylje van Sinderen

De bedoeling is dat der yn de rin fan de wike en fral op freed noch in tal klassikers yn de haven komt te lizzen. Behalve bakdekkers sil ek in tal klassike slepers en opdrukkers nei de Komerk komme. Nijsgjirrich skip is de 'Feint' fan skipper Beetsma út Weidum. Yn dizze sleper leit in iensilinder 'Industrie'. Op freedtemiddei, nei de iepening, sil der in demonstraasje wêze fan de 'handstart' fan dizze bysûndere motor. Dêrnei kin it publyk eefkes mei de 'Feint' it wetter op.