It hie tongersdeitejûn de tritichste maart wol wat fan in reuny. Manmachtich kamen ynwenners en (âld)learlingen ôf op de iepen jûn fan de Balsemyn. Noch ien kear mar ris efkes binnen sjen foardat fanôf maaie de sloper syn wurk dwaan sil.
Yn de lokalen leine fotoboeken dêr't men fuortdaliks op ôf stoarme en sawat de hiele jûn yn sjen bleau. Mar der wiene ek fideofilms te sjen oer bysûndere gebeurtenissen út it ferline.
In reaksje dy't justerjûn faak te hearren wie, wie: ,,Wat skande dat dit moaie skoallegebou ferdwine moat." Mar it is net oars, fanôf maaie sil it gebou sloopt wurde en sil der hurd wurke wurde oan it nije ûnderkommen. Op 24 april sille de learlingen yn in 'lawaaioptocht' it boerd fan de skoalle nei it needûnderkommen op de Blauhûskamp bringe, sa sille hja ôfskie nimme fan 'harren' Balsemyn.