Yn jannewaris wurdt alle jierren de Dakar Rally hâlden. Net mear yn Afrika, sa as eartiids, mar yn Súd-Amearika.
De kommende edysje wurdt foar Eastermarder Allard Tadema hiel spannend want hy sil as monteur mei yn it 'Riwald Dakar team'. Yn dit team ride trije Mitsubishi Racing Lancers mei en in Ginaf rallytruck mei in DAF-motor fan mar leafst 750 pk. Allard sit oan board fan ien fan de twa servicetrucks, dy't ek meigean.
Foar him kaam in dream út doe't er belle waard om lid te wurden fan it team. "Wy hawwe al in kear in rally riden yn Marokko en dat gie goed; wy binne mei de truck fyfde wurden. Ek it team, in lytse 30 man, hat in klik mei-inoar. En hiel noflik, der is gjin nee te keap. Wy, de monteurs, twifelen oft wy twa of trije reserveturbo's meinimme soene. Doch mar trije, sei de lieding. Dus sa giet soks.
By de Dakar Rally ride wy oerdei de transfer rjochtstreeks nei it folgjende plak op 'e rûte, mar wannear 't de rallytruck yn de problemen komt, dan moatte wy dêr hinne. Ferrint de dei goed, dan komme de trucks as lêste binnen (as earste komme de motoren binnen, dan de rally-auto's) en dat betsjut jûns en by need nachts 'sleutelje', ôfhinklik fan hoe't de truck him dy dei hâlden hat."

Allard fleant ein desimber nei Argentinië en komt mei in protte Dakarûnderfining fanút Lima werom.

Mear oer de ambysjes fan it Riwald Dakar team

Website Riwald team